1. Tuanzie hukoo Arusha
KAMA wewe unadhani huna fedha, basi kuna
wengine ambao wamezichimbia Ardhini, tena kwa Mamilioni.
Benki ya chini ya
ardhi iliyosheheni mamilioni ya fedha, zilizoswekwa ndani ya mifuko myeusi ya
plastiki na kufukiwa mchangani, imechimbuliwa na matrekta ya kutengeneza
barabara jijini Arusha huku noti nyekundu zikitawanywa kila kona na kufanyika
kuwa 'Sadakalawe - Amina,' kwa kila mpita njia ambaye angeweza kujitwalia
fungu.
Ilikuwa ni mshikemshike katika eneo la
Mianzini Jiji Arusha, ambako kuna mradi mkubwa wa upanuzi wa barabara ya kutoka
Mianzini Mataa hadi Ilkiding'a
Watu walipigana vikumbo katika harakati za
kujineemesha na fedha zilizokuwa zimetapakaa eneo hilo. Ikiwa imesheheni noti
tupu, tena nyekundu na mpya, kufumuliwa kwa akaunti hiyo ya benki ya chini ya
ardhi pamoja na kuwa neema kwa wapita njia na wakazi wa eneo hilo, kuligeuka
pia kuwa kilio kwa mmiliki wa hazina hiyo, Christopher Akoonay maarufu kama
'Mmbulu' ambaye sasa amejipatia jina jingine la 'Mabulungutu.'
Akonaay ni mkulima, lakini hasa
akijishughulisha na ufugaji wa Ng'ombe wa Maziwa. Yeye hudamka asubuhi kukamua
mifugo na kisha kusambaza bidhaa hiyo ya maziwa katika maeneo mengi ya jiji
katika kuwauzia wakazi wa Arusha.
Na katika siku ya tukio, Akonaay alikuwa yuko
kwenye shughuli zake za kuwapelekea maziwa wateja wake, ndipo watengeneza
barabara walipofika eneo hilo la Mianzini na tingatinga zao na kuanza kuichimba
njia hiyo ya kutoka Mianzini hadi Ilkiding'a katika kata ya Ilboru, inayotenganisha
Jiji la Arusha na wilaya ya Arumeru.
Ikiwa imejengwa kwa fito na matope, nyumba ya
'Mmbulu' ilikuwa miongoni mwa zile zilizobomolewa na ni baada ya wamiliki wake,
kugoma kuzibomoa wenyewe ili kupisha upanuzi wa barabara hiyo.
Akonaay amesema shauri lao walilipeleka Mahakamani
kudai fidia kabla ya mradi wa Barabara haujapita hapo, Akonaay ameongeza kuwa
mara baada ya kesi yao kutupiliwa mbali na chombo hicho cha Sheria, Wajenzi
hawakusubiri hata saa moja ipite, bali walikwenda moja kwa moja eneo hilo na
kuanza kazi.
Baadhi ya wakazi wa Mianzini, wamezungumzia
suala hilo kwa masharti ya kutotajwa majina, wamesema ni ajabu kwa Mzee Akonaay
kuwa na kiasi kikubwa cha fedha na kuzifukia ardhini huku mwenyewe akiishi
kwenye nyumba duni ya matope.
Lakini Akonaay ambaye kwa sasa anaitwa 'Mabulungutu,'
amesema kuwa alikosa Imani na Benki maana wakati akifanya kazi serikalini miaka
ya 1980, alifungua akaunti na akawa anaweka fedha zake zote benki.
Baada ya kustaafu mwaka 1994 na kuamua
kushughulika na ufugaji, hakuzifuatilia tena fedha zake benki hadi mwaka 2000,
ambako alipokwenda kuangalia fedha zake aliambiwa kuwa kwa sababu akaunti yake
haikuguswa kwa zaidi ya miaka 10, alitakiwa aende Benki Kuu ya Tanzania (BoT)
kujieleza. Hata hivyo, aliona huo ni usumbufu na kuamua kuanza kuweka fedha
zake Nyumbani.
Lakini hii pia ilimtokea puani baada ya mmoja
wa ndugu zake kuzikwapua zote mara baada ya kuzifuma katika vitita vyenye
thamani ya Sh milioni 20 na zaidi. Sasa Akonaay akaja na mkakati mpya wa
kuhifadhi fedha kwa kuchimba shimo katikati ya chumba chake cha kulala,
kilichokuwa upande wa barabara ya Mianzini na kuanza kuweka hazina yake humo.
Lakini tena, bahati mbaya ikiendelea
kumuandama, Makatapila ya wachonga barabara, yakaifukua benki yake hiyo ya Ardhini
na kutawanya fedha zaidi ya Sh milioni 35 zilizoishia kuokotwa na wapita njia
pamoja na majirani, ambao kwa hofu hawakupenda hata kulizungumzia sakata hilo.
*…………………..*…………………….*………………………..*
2.
WALIMU
wanafunzi wanne wa Chuo Kikuu cha Elimu Dar es Salaam (Duce) na cha Kumbukumbu
ya Mwalimu Nyerere waliohusika kumpiga vibaya mwanafunzi wa Shule ya Sekondari
Mbeya wamefukuzwa chuo huku Jeshi la Polisi mkoani Mbeya likiwashikilia kwa
mahojiano walimu wengine watano wa shule hiyo kutokana na tukio hilo.
Aidha, Serikali
imemvua madaraka Mkuu wa shule hiyo, Magreth Haule kwa kutochukua hatua baada
ya kitendo hicho kufanyika shuleni hapo Septemba 28, mwaka huu.
Hatua hizo
zimechukuliwa baada ya Jumatano Octoba5 katika mitandao ya kijamii kusambaa
kipande cha video kikionesha walimu zaidi ya watatu wakiwa eneo la ofisi
wakimshambulia kwa kumpiga makofi, mateke na fimbo sehemu mbalimbali za mwili
hasa kichwani mwanafunzi Sebastian Chinguku.
Waziri wa
Elimu, Sayansi, Teknolojia na Mafunzo ya Ufundi, Profesa Joyce Ndalichako
ametangaza kuwafukuza chuo walimu wanafunzi hao walioshiriki kitendo cha
kumpiga mwanafunzi huyo wa kidato cha tatu wa Shule ya kutwa ya Sekondari ya
Mbeya.
Walimu hao ni
Frank Msigwa (anayedaiwa kumpiga zaidi mwanafunzi huyo kwa makofi kichwani),
John Deo na Sante Gwamaka wote wa Duce na Evans Sanga wa Chuo Kikuu cha
Kumbukumbu ya Mwalimu Nyerere.
Akizungumza na
vyombo vya habari jijini Dar es Salaam Jumatano Profesa Ndalichako amesema kitendo
hicho ni cha kikatili, na kuwa walimu
hao wanafunzi hawafai kuendelea na taaluma hiyo ya ualimu na kuwa hatua zaidi
za kisheria zinaendelea kuchukuliwa dhidi yao.
Profesa
Ndalichako amesema kwa mujibu wa taratibu za vyuo vikuu kitendo kilichofanywa
na Walimu wanafunzi hao ni kosa la jinai na kuwa hakiwezi kufumbiwa macho.
Vilevile ametoa
onyo kali kwa Wanafunzi wanaokwenda kwenye mafunzo kwa vitendo na kwenda
kinyume cha taaluma yao kuwa wanapoteza sifa hivyo amewataka kuzingatia maadili
ya fani na taaluma wanazosomea.
Kamanda wa
Polisi Mkoani Mbeya, Dhahiri Kidavashari amesema wanawashikilia walimu wa shule
hiyo watano kwa mahojiano kuhusu tukio hilo. Hata hivyo, amesema si kwamba
walimu hao wanaohojiwa ndio waliohusika na tukio hilo bali wameanza na wale
waliopo ili kupata taarifa zaidi.
Akieleza
sababu ya Adhabu hiyo, Kamanda amesema katika mahojiano ya awali imebainika
kuwa Mwalimu wa Kiingereza alitoa kazi, lakini baadhi ya wanafunzi hawakufanya
baadaye mwalimu huyo aliwapa adhabu ya kupiga magoti, lakini mwanafunzi huyo
alionekana kupinga kwa kueleza ana tatizo la goti hatoweza kufanya adhabu hiyo
na mwalimu aliamua kumpeleka ofisini na kumpiga kwa kumchangia.
Katika taarifa
yake, Waziri wa Mambo ya Ndani ya Nchi, Mwigulu Nchemba, amesema Septemba 28
mwaka huu, mwanafunzi Chinguku wa kidato cha tatu wa Shule ya Sekondari Mbeya, Mkazi
wa Uyole, alipigwa na walimu watatu.
Naye Waziri katika
Ofisi ya Rais, Tawala za Mikoa na Serikali za Mitaa (Tamisemi), George
Simbachawene ameagiza mamlaka za nidhamu kumvua madaraka Mkuu wa Shule hiyo,
Haule kwa kushindwa kuchukua hatua na kutoa taarifa mara baada ya tukio hilo
kufanywa na Walimu Hao shuleni hapo.
George
Simbachawene amevishauri vyuo vya Ualimu Viweke mkazo katika kufundisha Walimu
vijana namna ya kuwa zaidi ya Walimu, kuwa na uvumilivu, subira na kuzingatia
sheria. Wafunzwe kisaikolojia kukubali kuwa hawaishii kuwa walimu bali
wanaingia kwenye kundi la malezi.
*…………………………*………………………….*……………………………*
3.
BAADHI ya
Wachumi nchini wameitabiria neema Tanzania baada ya Rais wa Jamhuri ya
Demokrasia ya Congo (DRC), Joseph Kabila, kuihakikishia Tanzania kuwa mizigo
yote ya DRC itapitia katika Bandari ya Dar es Salaam. Pamoja na hayo, wachumi
hao wametahadharisha Serikali ya Awamu ya Tano, sasa kuanza kuwajibika ipasavyo
kwa kutengeneza mazingira mazuri ya bandari hiyo, ikiwemo mifumo mbalimbali ya
miundombinu ili kuweza kuvutia zaidi nchi nyingine kutumia Bandari za Tanzania.
Mtaalamu wa
Uchumi kutoka Chuo Kikuu cha Dar es Salaam (UDSM), Dk Haji Semboja, amesema
ziara ya Rais Kabila ni neema kwa Tanzania endapo tu serikali kupitia taasisi
zake zitajipanga vyema kuboresha zaidi huduma za Bandari na maeneo mengine.
Amekiri kuwa
nchi ya DRC imekuwa na ushirikiano wa muda mrefu na Tanzania na mambo mengi.
Lakini, katika suala la kibiashara ni vyema Tanzania ijipange, ingawa
kijiografia nchi hiyo inaitegemea zaidi Tanzania kuliko Tanzania inavyoitegemea
katika suala la Bandari.
Mtaalamu huyo
amesema ziara hiyo imeibua mambo mazuri kwa nchi yetu, tukiyatumia vizuri
uchumi wetu utapaa na sisi kuwa sehemu ya nchi zenye huduma bora za Bandari.
Jambo la msingi lazima tuwajibike na kutambua kuwa maendeleo ya wenzetu
yanatutegemea sisi
Amesema DRC
haihitaji bandari pekee bali inahitaji huduma nyingine kama vile mfumo mzima wa
miundombinu kama vile Barabara, Meli, Reli na Ziwa Tanganyika.
Vile vile
Mtaalamu huyo amepongeza hatua ya Rais John Magufuli, kuanza kwa kutoa msamaha
kwa mizigo ya DRC na kuiongezea muda kutoka siku 14 hadi 30 na kubainisha kuwa
pamoja na kwamba itakuwa na hasara kidogo kwa serikali, lakini itawavutia zaidi
wafanyabiashara wa nchi hiyo.
Kwa upande
wake, Dk John Mtui ambaye naye ni Mtaalamu wa uchumi kutoka UDSM, amesema
kupitia ushirikiano huo wa DRC na Tanzania, Watanzania watarajie mambo mengi
mazuri ya kiuchumi. Hata hivyo, amesema ni wakati sasa kwa Serikali ya Tanzania
kuanza kuharakisha ujenzi wa reli ya kisasa ya 'standard garage' itakayokuwa
msingi na kiunganishi kikuu cha Biashara baina ya nchi hizo mbili.
Amesema
anatambua kuwa Serikali ya Tanzania imekopa fedha kwa ajili ya Ujenzi wa Reli hiyo
na kufafanua kuwa, deni la fedha hizo linaweza kurejeshwa na Uchumi kukua kwa
kasi, endapo huduma za Bandari zitavutia kuliko Bandari nyingine.
Zile
changamoto kama vile kuchelewesha mizigo, Rushwa iliyokithiri na Urasimu Bandarini
na maeneo ya Usafirishaji zikidhibitiwa, Uchumi wa Tanzania unaweza kubadilika
kuliko inavyotarajiwa.
Amesema
takwimu zinaonesha kuwa Malori mengi ya mizigo yanasafirisha mizigo hiyo kwenda
na kutoka DRC, hivyo kukamilika kwa Reli hiyo, kutapunguza gharama kwa nchi
hiyo na nyingine za jirani na hivyo kuvutiwa zaidi kuitumia bandari ya
Tanzania.
Rais Magufuli ameahidi
kuboresha zaidi Mazingira ya huduma ya Bandari hiyo na kusisitiza kuwa Idadi ya
mizigo kutoka DRC imeongezeka na kufikia asilimia 10.6 ambapo hadi sasa Biashara
baina ya nchi hizo imeongezeka kutoka Sh bilioni 23 mwaka 2009 hadi Sh bilioni
396.3.
*……………………….*…………………….*………………….*
4.
Na tuelekee
huko Dar es salaam
Makamu wa
Rais, Samia Suluhu Hassan amesema Serikali imejipanga kuzishughulikia na
kuzimaliza changamoto zinazowakabili Wafanyabiashara ndogo nchi nzima ikiwemo
Kariakoo ili kuwawezesha kufanya Biashara katika mazingira bora bila usumbufu.
Samia amesema
hayo alipokuwa akizindua Jumuiya ya Wanawake Wajasiriamali na Biashara Kariakoo
(JUWABIKA), jijini Dar es Salaam.
Amesema Serikali
inajua kuwa Kariakoo ni kitovu cha Biashara, pia inatambua changamoto
zinazowakabili Wafanyabiashara hao hususan zinazowagusa wanawake na akinamama
ndio maana imejipanga kuzishughulikia.
Amesema pia
inatambua ugumu uliokuwepo kwa Wafanyabiashara wadogo kupata mikopo ya
kujiendeleza kutoka katika benki na taasisi mbalimbali za fedha ikiwemo riba
kubwa na masharti magumu ya ukopeshwaji.
Samia amesema
kuhusu fursa za Mikopo, vilevile anaendelea kutoa wito kwa Benki kuona namna
bora ya kuwakopesha Wafanyabiashara wadogo kwa masharti nafuu ili wakuze Mitaji
yao, Serikali itahakikisha fursa ya mikopo kwa ajili ya mitaji inapatikana bila
Urasimu na kwa masharti nafuu na kuwafikia Wananchi wengi mijini na vijijini.
Amewashauri
pia wanawake kuwa mbele katika ulipaji wa kodi za Serikali kwani kodi hizo ndio
zinazosaidia katika shughuli za maendeleo, kusomesha watoto na dawa
hospitalini.
Awali Mke wa
Rais wa Awamu ya Nne, Mama Salma Kikwete aliwataka wanawake hao wanaotokea eneo
la Kariakoo wasisite kueleza changamoto zao pale wanapokumbana nazo kwa kuwa
wanatoa pato kubwa kwa serikali kupitia kodi wanazolipa.
Mwenyekiti wa
Jumuiya hiyo, Mwamvua Kinanda ameeleza changamoto wanazokabiliana nazo kuwa ni
mtaji, ukosefu wa elimu ya Ujasiriamali na Biashara, uwepo wa machinga katika
maeneo yao ya Biashara, Mlolongo wa kodi pamoja na Riba kubwa katika Benki.
*………………………..*…………………….*…………………*
5.
RAIS John
Magufuli amewapongeza viongozi na wafuasi wa Madhehebu ya Bohora kwa kutumia
maadhimisho ya Tamasha la Mabohora Duniani kuhimiza amani, upendo na
mshikamano.
Aidha
amewashukuru kwa kushiriki katika maendeleo ya kijamii na kiuchumi ikiwemo
mchango wa Dola za Marekani 53,000 zilizotolewa na Kiongozi Mkuu wa Bohora kwa
Serikali kwa ajili ya kuchangia kampeni ya utengenezaji wa Madawati, na
kuwaleta Madaktari kutoka Hospitali ya Saifee ya India waliotoa Matibabu bure
kwa wananchi wa Arusha.
Ameyasema hayo
wakati akihutubia katika Tamasha la Madhehebu ya Bohora ambayo yanafanya Maadhimisho
ya dunia ya sikukuu ya mwaka mpya wa Kiislamu jijini Dar es Salaam.
Maadhimisho
hayo yaliwaleta nchini wafuasi zaidi ya 30,000 kutoka nchi mbalimbali duniani
na kuongozwa na Kiongozi Mkuu wa Madhehebu ya Bohora Duniani, Mtukufu Dk Syedna
Mufaddal Saifuddin Saheb (TUS).
Amehutubia
wafuasi wa Bohora katika Msikiti wa Hakimi uliopo Upanga jijini Dar es Salaam,
Rais Magufuli amemshukuru Kiongozi Mkuu wa Bohora kwa kukubali kufanya
maadhimisho ya mwaka mpya wa madhehebu hayo hapa nchini.
Amewashukuru
pia na kuwapongeza Wafuasi wa Madhehebu hayo kwa kukubali kuja nchini na kukaa
kwa siku zote za Maadhimisho yaani kuanzia Oktoba 2 walipoanza hadi Oktoba 11,
watakapomaliza.
Aidha, Rais
Magufuli amewakaribisha wafuasi wa Bohora duniani kuja kuwekeza nchini katika
sekta mbalimbali zikiwemo kilimo, Uvuvi, Misitu, Mifugo, Madini na Gesi kwani
soko la uhakika lipo ndani ya nchi, katika Jumuiya ya Afrika Mashariki (EAC) na
Jumuiya ya Maendeleo Kusini mwa Afrika (SADC) yenye watu takribani milioni 400.
Dk Saheb amemshukuru
Rais Magufuli kwa kuungana na wafuasi wa madhehebu ya Bohora katika maadhimisho
hayo
6.
Na huko Afrika ya Kusini
Maandamano ya Amani
ya Wanafunzi wa vyuo vikuu nchini Afrika Kusini yamegeuka kuwa fujo baada ya Jeshi
la polisi kuingilia kati ili kuvuruga maandamano hayo mjini Johannesburg.
Shirika la Habari
la IRNA limeripoti kuwa, mamia ya wanafunzi wa vyuo vikuu walifanya maandamano
ya amani juzi Ijumaa kulalamikia siasa za Serikali ya Rais Jacob Zuma na Mazingira
yao ya Masomo, lakini maandamano hayo yaligeuka kuwa fujo baada ya polisi
kuingilia kati.
Wanafunzi hao
wametaka kuongezewa posho zao huku Wanafunzi wenye asili ya Afrika Kusini
wakiitaka serikali iwasomeshe bure.
Hii ni katika
hali ambayo, gharama za masomo katika vyuo vikuu vya Afrika Kusini ni kubwa
sana kiasi kwamba wenyeji wengi wa nchi hiyo hawawezi kuyamudu.
Kwa mujibu wa Habari
hiyo, mazungumzo ya wakuu wa vyuo vikuu vya Afrika Kusini na Wawakilishi wa
vyama vya wanachuo yameshindwa kuzaa matunda, na matakwa ya wanafunzi hao
hayajakubaliwa.
Viongozi wa
Afrika Kusini nao wametaka maandamano hayo yasitishwe mara moja ili wazuie
kufungwa vyuo vikuu ambavyo wanafunzi wake wataendelea na migomo na maandamano.
*……………………………*……………………*……………………….*
7.
Wasichana wenye umri wa kati ya miaka 5 na 14
wanatumia asilimia 40 zaidi ya muda au saa milioni 160 kwa siku kufanya kazi za
Nyumbani zisizo na malipo kote duniani.
Kazi hizo ni pamoja na kuteka maji na kusenya
kuni, ikilinganishwa na Wavulana, Imesema ripoti ya Shirika la Umoja wa Mataifa
la Kuhudumia Watoto (UNICEF) iliyotolewa, kabla ya Siku ya Kimataifa ya Mtoto
wa kike itakayoadhimishwa Jumanne ya Oktoba 11.
Ripoti hiyo yenye lengo la Kuimarisha Uwezo
wa Takwimu kwa ajili ya Wasichana na Kuorodhesha idadi na kuangalia mbele kwa
ajili ya ajenda ya mwaka 2030, Inajumuisha makadirio ya kwanza ya dunia ya
wakati unaotumiwa na Wasichana kufanya kazi za nyumbani kama vile kupika,
kusafisha, kutunza familia, kuteka maji na kusenya kuni.
Ripoti inaonyesha kwamba, tofauti hiyo huanza
mapema na mara nyingi kazi zinazofanywa na mtoto wa kike hazionekani na
hazithaminiwi. Maeneo yaliyoathirika zaidi ni pamoja na Somalia, Burkina Faso
na Yemen, huku utafiti ukitaja kuwa wasichana weye umri wa miaka 10 na 14
Kusini mwa Asia, Mashariki ya Kati na Afrika ya Kaskazini hutumia muda
mara mbili kufanya kazi za nyumbani kuliko wavulana.
Mwandishi wa ripoti hiyo Claudia Cappa wa
Shirika la Umoja wa Mataifa la Kuhudumia Watoto (UNICEF) amesema, Kutofautiana
kwa kazi hizi za nyumbani kunaonyesha
kwamba jukumu la msingi la mtoto wa kike ni kuwa nyumbani na kufanya kazi hizo.
Na hii inawafanya kutojitegemea kiuchumi
Bi Claudia amependekeza kuwa, Ni muhimu
kwamba sisi tunawekeza kwa wasichana katika uwezo wao na kuhakikisha kwamba
wanakua kwa kujiamini na kujihisi kuwa na nguvu katika maisha yao. Na ni muhimu
pia kuziimarisha jamii na familia ili kuzipa msaada muhimu wa kuwasaidia
wasichana
*………………….*……………….*………….....*
8.
Mwakilishi wa
Mfuko wa Watoto wa Umoja wa Mataifa UNICEF ametahadharisha kuhusiana na vifo
vya watoto nchini Uganda.
Aida Girma amesema hayo katika ripoti
iliyopewa jina la "Hali ya Watoto Duniani Katika Mwaka 2016" na
kusisitiza kwamba, katika hali ya hivi sasa watoto 127 hufariki dunia kila siku
nchini Uganda kutokana na Maradhi mbalimbali kama Malaria.
Amesema kuna haja ya kufanyika juhudi
maradufu na kwa kutumia suhula zilizopo nchini humo ili kuboresha hali ya mamia
ya maelfu ya watoto wa nchi hiyo ya Afrika Mashariki.
Mwakilishi wa Mfuko wa Watoto wa Umoja wa
Mataifa UNICEF amesisitiza kuwa, shirika hilo linafanya juhudi kuhakikisha
kwamba, Uganda iwe ni nchi ambayo watoto wake wanapata haki za awali na za
kimsingi, kusiweko na watoto wanaokabiliwa na njaa nchini humo na mtoto yeyote
asipoteze maisha kutokana na Maradhi ambayo yanaweza kutibika.
Takwimu zinaonesha kuwa, kuna takribani
watoto milioni nane nchini Uganda ambao wanaishi katika umasikini na kwamba,
kuna haja ya kuwekwa mikakati ya kuwaokoa watoto hao katika kipindi cha miaka
25 Ijayo.
Aidha kwa mujibu wa sensa ya hivi karibuni
kabisa, Uganda ina Wakazi karibu Milioni 38 ambapo nusu yao wana umri wa chini
ya miaka 15.
*………………*…………………*……………….*…………..*
9.
Na sasa tuelekee huko Sudan
Serikali ya
Sudan Kusini imewataka wapiganaji wa Riek Machar, Makamu wa zamani wa rais na
kiongozi wa waasi, kurejea Juba, mji mkuu wa nchi hiyo.
Naibu Waziri
wa masuala ya Habari Nchini Sudan Kusini, Paul Akol Kordit ametoa wito huo hapo
juzi akiwataka askari 750 watiifu kwa Riek Machar, kurejea mjini Juba kwa ajili
ya kujiunga na Jeshi la Serikali. Akol Kordit ameongeza kuwa, Serikali ya
Jamhuri ya Kidemokrasia ya Kongo tayari imechukua uamuzi wa kuwaondoa askari
hao. Amesisitiza kuwa, Jumanne iliyopita Serikali ya Juba iliwataka askari wa
kusimamia amani wa Umoja wa Mataifa nchini Kongo DR kushiriki kuwafukuza askari
hao 750 kutoka katika nchi hiyo jirani.
Askari hao
waliondoka Mjini Juba mwezi Julai mwaka huu baada ya kushamiri mapigano kati ya
askari watiifu kwa Rais Salva Kiira na Machar, mapigano ambayo yalisababisha
mamia ya watu kuuawa na maelfu ya wengine kuwa wakimbizi.
Naibu Waziri
wa masuala ya Habari nchini Sudan Kusini, Paul Akol Kordit amezitaka nchi za
eneo hilo kuiunga mkono Serikali ya umoja wa kitaifa ya nchi hiyo.
Hayo yanajiri
katika hali ambayo Riek Machar ambaye kwa sasa yuko Mjini Khartoum, Sudan
amewataka wafuasi wake kuanzisha mapigano dhidi ya Serikali Ya Rais Salvar Kiir
huku akisema kuwa, makubaliano yaliyofikiwa mwezi Agosti mwaka jana hayana tena
itibari yoyote.
*………………………*……………………*………………………..*
10.
Maandamano ya wananchi Waislamu wa Nigeria wanaotaka
kuachiliwa huru Sheikh Ibrahim Zakzaky, Kiongozi wa Harakati ya Kiislamu ya
Nigeria yameendelea kushuhudiwa nchini humo licha ya ukandamizaji wa vikosi vya
usalama dhidi ya Waandamanaji.
Jimbo la Kaduna kwa mara nyingine tena limeshuhudia
maandamano makubwa ya kumuunga mkono Sheikh Ibrahim Zakzaky anayeshikiliwa
korokoroni na vikosi vya usalama kwa karibu mwaka mmoja sasa.
Wananchi wa Kaduna juzi Ijumaa waliandamana na kutangaza
himaya na uungaji mkono wao kwa Mwanazuoni huyo wa Kiislamu na kutoa wito wa
kuachiliwa huru haraka mwanaharakati huyo wa Kiislamu.
Kama ilivyokuwa katika maandamano mengine ya kumuunga
mkono Sheikh Ibrahim Zakzaky, maandamano ya juzi pia mjini Kaduna yalishuhudia
jeshi la Nigeria likiingilia kati na kuwatawanya waandamanaji hao kwa kutumia
mabomu ya kutoa machozi na risasi za blastiki.
Ikumbukwe kuwa kati ya Disemba mwaka 2015, Jeshi la
Nigeria liliwashambulia wafuasi wa Harakati ya Kiislamu Nigeria katika mji
wa Zaria jimboni Kaduna kaskazini mashariki mwa nchi hiyo.
Jeshi hilo lilidai kuwa wafuasi wa Harakati ya Kiislamu
ya Nigeria inayoongozwa na Sheikh Zakzaky walikuwa na njama ya kutaka kumuua
Mkuu wa Jeshi la Nigeria, madai ambayo yamekanushwa vikali na wafuasi wa
harakati hiyo. Jeshi hilo katili liliizika miili ya waliouawa katika kaburi
moja kwa lengo la kuficha ushahidi wa ukubwa wa jinai hiyo.
*…………………..*…………………*…………………………*
11.
Watu zaidi ya
160 wameuawa katika mji mkuu wa Yemen Sana'a baada ya ndege za kijeshi za Saudi
Arabia kuwashambulia raia waliokuwa katika shughuli ya mazishi.
Ripoti zinasema kuwa, watu wasiopungua 160
wameuawa katika mashambulio kadhaa yaliyofanywa na ndege za kijeshi za Saudia
dhidi ya waombolezaji waliokuwa katika shughuli ya mazishi mjini Sana'a, jana
Jumamosi alasiri.
Shirika la Habari la Xinhua limeripoti kuwa,
watu 160 wameuawa kwa umati katika shambulio hilo la ndege za kijeshi za
Saudia. Ripoti zaidi zinasema kuwa, miongoni mwa waliouawa wapo maafisa wa
ngazi za juu wa Yemen.
Aidha mamia ya watu wameripotiwa kujeruhiwa
katika jinai hiyo huku kukiweko na uwezekano wa idadi ya vifo
kuongezeka. Baadhi ya duru zimeyataja mashambulio ya leo ya ndege za Saudia
dhidi ya waombolezaji waliokuwa katika shughuli ya mazishi kwamba, ni mauaji ya
umati.
Septemba mwaka jana pia, ndege za kijeshi za
Saudia zilishambulia sherehe ya harusi na kuua kwa umati watu wasiopungua
130. Mashambulio na jinai za Saudia na washirika wake zinaendelea kila
uchao dhidi ya wananchi wasio na hatia wa Yemen huku Umoja wa Mataifa na
baraza lake la usalama zikiwa zinanyamazia kimya ukatili huo.
Tangu Ilipoanzisha uvamizi wake wa kijeshi
dhidi ya Yemen mwezi Machi mwaka uliopita, hadi sasa muungano vamizi wa kijeshi
unaoongozwa na utawala wa Aal Saud na kuungwa mkono na Marekani na Israel
umeshazishambulia skuli, hospitali, makaazi ya raia misikiti, barabara,
masoko na kambi za wakimbizi na kuua maelfu ya raia wasio na hatia wa nchi hiyo.
Zaidi ya watu 10,000 wamepoteza maisha katika hujuma ya kinyama ya Saudia dhidi
ya Yemen