Wapo watu maisha yao ya
kazi yamejaa wasiwasi. Wanapoingia kazini hawajiamiani. Wapo wanaofikia hatua
ya maradhi ya shinikizo la damu kwa sababu ya aina ya mabosi walionao kazini.
Wengine wapo kazini kwa
kuvumilia kuliko kupenda wanachofanya. Hawa ni wale wanaofanya kazi kwa sababu
ya mshahara. Hapendi alipo lakini hana jinsi, maana kipato anachoingiza ndicho
kinampa uwezo wa kutatua shida zake za kimaisha.
Kwa nini usifurahie kuwapo
sehemu inayokupa riziki yako? Hupaswi kuamka asubuhi umekunja ndita wakati
ukielekea kazini. Haitakiwi njia nzima uwe unaomba ukute bosi wako hajafika.
Usiishi kama panya, kwamba
wao hutamba na kufanya safari nyingi ndani ya nyumba pale paka anapokuwa
hayupo.
Hutakiwi kuwa na furaha
pale bosi wako asipokuwapo. Tabasamu na furaha yako vinapaswa kuwapo muda wote,
tena vichanue mbele ya bosi wako.
Je,
bosi wako ni mkorofi na anakufanya kila ukimuona utetemeke? Siyo shida, jukumu
la kumtuliza ni lako mwenyewe. Njia za kumfanya azungumze na wewe kwa upole
badala ya ukali zipo ndani ya uwezo wako.
Eneo la kutambua sababu ya
wewe kuajiriwa ni muhimu zaidi. Maana kama hutambui upo kazini kwa ajili gani,
hata ukaririshwe mbinu milioni bado hazitakusaidia. Kutambua humaanisha akili
inafanya kazi sawasawa, inajielewa. Baada ya hapo zipo silaha nne za kushika.
Nidhamu
Utii wa kila kitu kazini
utakufanya usimwogope bosi wako. Hapa sizungumzii utii wa woga au nidhamu ya
woga kama inavyofahamika kwa wengi. Nidhamu ninayozungumzia hapa ni ile ya
kuhakikisha kila kitu kinakuwa kwenye mpangilio wake.
Bosi wako ni mkorofi,
vilevile ni msema ovyo na anapenda kukaripia. Nidhamu yako ya kufanya mambo
yako kwa mpangilio, itamnyima sababu ya kufoka. Akishazoea kutokufokea moja kwa
moja ndani yake kunakuwa na zuio la ukali juu yako.
Kisaikolojia, hali ya
kufoka haiji mara moja, bali hufuata baada ya mazoea. Huwezi kuwa mfanyakazi
mgeni siku ya kwanza tu bosi wako akafoka na kukukaripia. Vipo vitendo
hutengeneza mfikie hali hiyo.
Nidhamu yako itadhibiti vishawishi vya kufokeana.
Watu wazima wanapofokeana,
tafsiri yake ya kisaikolojia ni kuwa kuna nyuzi za kuheshimiana zimekatika. Usikubali kukosewa heshima na kudhalilishwa kwa kufokewa
mbele za watu kazini. Kumbuka kuna aina kadhaa za nidhamu kama inavyoanishwa
hapa chini.
Nidhamu ya kuwahi kazini; fika muda ambao umepangwa
au kabla. Mara nyingi suala la kuwahi lina changamoto zake lakini kwa vile
unalinda heshima, wahi kila siku. Mnyime bosi wako sababu ya kuzungumza kuhusu
mahudhurio.
Nidhamu ya utendaji; hakikisha majukumu yako yanatimia kulingana
na muda. Kila kazi zako zinapouliziwa ziwe tayari au zimefika hatua nzuri.
Nidhamu ya usafi; usafi wako binafsi na ule wa kazi yako ni
muhimu. Uchafu utasababisha nyuzi za kuheshimiana zikatike kisha iwe mwanzo wa
bosi wako kukufokea.
Nidhamu ya mawasiliano; wasiliana vizuri na bosi wako pamoja na
wafanyakazi wenzako. Eneo la mawasiliano likilega litakutengenezea kasoro.
Fahamu kuwa njia kuu ya kummudu bosi wako mkorofi ni kumfanya asikuangalie kwa
jicho hasi.
Juhudi
Lazima ujipambanue kama
mchapakazi. Uvivu utakupa wakati mgumu mbele ya bosi mkorofi. Fanya kazi kwa
bidii na juhudi yako ionekane kazini. Unapomaliza majukumu yako ya siku, si
vibaya ukawasaidia na wenzako muda unapokuruhusu.
Ikitokea kazi mpya na bosi
wako anapita akiuliza nani anaweza kuifanya, nyoosha mkono na umwambie akuachie
wewe uifanye.
Juhudi na moyo wako wa
kujitolea kazini vitamfanya bosi wako abadilike kutoka kuwa mkali hadi kuwa
mpole na mwenye upendo.
Ukiwa na juhudi kazini
utamfanya bosi wako apende kukuona. Aone ulazima wa wewe kuwapo. Mara nyingi
bosi anapokufokea, huo ni ujumbe kuwa hata usipokuwapo yeye hababaiki.
Maarifa
Jibiidishe kuongeza maarifa
ya kazi yako ili unapoifanya matokeo yawe tofauti na wengine. Hakikisha viwango
vya ufanisi wako vinakuwa bora, hivyo kumlazimisha bosi wako akuone ni muhimu.
Ukiwa na maarifa ya kutosha
kwenye kazi yako, utaifanya kazi yako kwa weledi. Boresha maarifa yako ya
darasani, boresha zaidi kwa vitendo. Ujuzi wako utamfanya bosi wako aone
usipokuwapo mambo mengi yataharibika.
Ukiwa na maarifa ya
kutengeneza matokeo bora kwenye kazi, maana yake unakuwa kiungo nyeti kazini.
Unapokuwa kiungo nyeti, wewe mwenyewe unajisikia upo salama. Huwezi kuishi kwa
wasiwasi wa kufukuzwa kazi wakati wowote au kukaripiwa.
Unapokuwa na maarifa ya
kutosha, utashangaa bosi wako mkorofi anafokea watu wengine halafu anakwita
ofisini kwake au anakuja kwako mjadili kazi. Hivyo basi, kila siku jitahidi
uongeze maarifa kwenye kazi yako ili uonekane mpya wakati wote.
Kujiamini
Nidhamu unayo, unafanya
kazi kwa bidii na una maarifa ya kutosha juu ya kazi yako, sasa wasiwasi wa
nini? Unapojiamini unaongeza thamani yako kazini na ukiwa muoga utachukuliwa
kama ulivyo.
Mfanyakazi mwenye kujiamini
na akawa anaifanya kazi yake vizuri, humfanya bosi mkorofi ajiulize namna ya
kumuingia. Ukiwa muoga, muda wa kazi unaweza kutimia lakini bosi akakwambia
ubaki.Anajisikia kutokana na woga wako.
Badala ya kuwa na woga bosi
wako anapokupigia simu au kukuulizia, wewe mpigie au mfuate ofisini kwake na
mzungumze kuhusu kazi. Ukikutana naye msalimie kwa kumpa mkono. Hakikisha
unajiamini bila kupunguza japo nukta.
JIUNGE
NASI KWA KUTUFOLLOW
fb@edonetz , twiter@edonetz , inst@edonetz_blog na youtube@edone tv